Pas rritjes në verë, tani vërehet një trend në rënie i numrit të rasteve të reja me KOVID-19 në mbarë botën. Sipas statistikave javore të Uorldmeters, në shtatë ditët e fundit, në nivel global vërehet një rënie prej 17 përqindëve të rasteve të reja, krahasuar me javën e kaluar. Për 11 për qind është ulur edhe numri i vdekjeve.

Në Evropë javën e kaluar pati 29 për qind më pak raste me Kovid, në Amerikën Veriore dhe Jugore për 27 për qind, në Azi për dy për qind, Afrikë për 49 për qind dhe Australi dhe Oqeani për 24 për qind.

Rënie të rasteve të reja në baza javore ka në pjesën më të madhe të vendeve evropiane, përfshirë edhe Maqedoninë e Veriut për 23 për qind më pak raste krahasuar me periudhën e mëparshme shtatëditore.

Rritje e numrit të personave me Kovid është regjistruar në Bosnjë dhe Hercegovinë, Letoni, Lituani, Poloni, Rusi, Serbi, Hungari dhe Spanjë.

Javën e kaluar Komisioni për sëmundje ngjitëse mbajti takim, në të cilin konstatoi se vendi është në fazën e transmetimit të gjerë me kapacitete adekuate reagimi dhe në kushte të tilla nuk ka nevojë për masa të reja për Kovid-in. KSN apeloi për sjellje të përgjegjshme dhe respektim të masave aktuale.

Advertisement

“Mbetet rekomandimi i fuqishëm për të gjithë qytetarët, ndërsa veçanërisht për qytetarët që i përkasin grupeve të rrezikuara për ecuri më të rëndë të sëmundjes, tu përmbahen të gjitha masave të përcaktuara epidemiologjike për mbrojtjen nga infeksioni, si larja e shpeshtë dhe thelbësore ose dezinfektimi i duarve, shmangia e turmave dhe qëndrimit në hapësira të mbyllura dhe pa ajrosje dhe mbajtja e maskave mbrojtëse, si dhe respektimi i rekomandimeve për vaksinimin kundër Kovid-19”, apeloi Komisioni.

Për momentin, sipas të dhënave të Institutit të Shëndetit Publik, janë 4.218 raste aktive me koronavirus. Numri më i madh janë nga Shkupi – 1.700, ndërsa në Dojran, Demir Kapi, Dellçevë, Makedonska Kamenicë dhe Makedonski Brod ka numër njëshifror të rasteve aktive. Pehçeva është i vetmi qytet në vend pa raste aktive.

Autoritetet shëndetësore në vend dhe në botë, megjithatë apelokjnë për vigjilencë për shkak të përkeqësimit të mundshëm të situatës epidemiologjike në vjeshtë.

Disa nga vendet e rajonit si Bullgaria dhe Mali i Zi kanë vendosur ta rikthejnë mbajtjen e detyrueshme të maskës mbrojtëse në ambiente të mbyllura. Autoritetet shëndetësore greke nuk po planifikojnë masa të reja kufizuese, por thonë se gjithçka do të varet nga situata në vjeshtë. Ata duan që KOVID-19, edhe pse mbetet pandemi, ta trajtojnë si një sëmundje endemike, “ku nuk do të ketë nevojë për masa të rrepta apo të detyrueshme”.

Qeveria gjermane, megjithatë, ka njoftuar se disa kufizime bazë do të mbeten në fuqi gjatë vjeshtës dhe dimrit të ardhshëm, kur ekspertët presin rritje të rasteveme KOVID-19 pasi njerëzit kalojnë më shumë kohë në hapësira të mbyllura.

Advertisement

Deri më tani në botë janë regjistruar rreth 590 milionë raste të koronavirusit, kanë vdekur 6.5 milionë njerëz dhe janë aktivë 22.5 milionë raste.

Në Maqedoninë e Veriut, numri i përgjithshëm i personave të diagnostikuar me KOVID-19 që nga fillimi i epidemisë është 330.755, numri i të shëruarve është 317.149, ndërsa numri i të vdekurve është 9.388.