Në Ministrinë e Ekonomisë do të kryhet revizion që nga viti 2015 e këndej për të parë se si ka punuar pushteti paraprak. Këtë mes tjerash sot e njoftoi ministri i ri i Ekonomisë dhe Punës, Besar Durmishi.

“Do të parashtrojmë kërkesë në Entin Shtetëror të Revizionit për revizion të plotë të funksionimit të Ministrisë së Ekonomisë duke filluar nga viti 2015, kur është kryer për herë të fundit revizion i plotë i funksionimit të Ministrisë nga Enti Shtetëror i Revizionit. Qëllimi i këtij revizioni është që ne, por edhe i gjithë opinioni të shohim se si është punuar në kohën e pushtetit paraprak”, tha Durmishi.

Durimishi duke folur për angazhimin e tij në krye të kësaj ministrie paralajmëroi se do krijojnë masa dhe politika për ringjalljen e ekonomisë së shtetit dhe përmirësimin e të drejtave të punëtorëve.

“Fokusi kryesor do të jetë: rritja e mbështetjes së industrisë, krijimi i masave për kompanitë mikro, të vogla dhe të mesme, rritja e konkurrentësisë së biznesit, tregu i brendshëm, tregtia, si dhe mbështetja e punëdhënësve, krijimi i masave dhe politikave për punësim, përmirësimi i tregut të punës dhe mbrojtja e të drejtave të punëtorëve”, tha Durmishi.

Në fushën e investimeve ai tha se do mbështesin financiarisht investimet për kompanitë vendore dhe të huaja. Ndërsa në fushën e konkurrencës së kompanive ai tha se do të mbështesin të njëjtën, transformimin e gjelbër dhe digjital të industrisë, ekonomi cirkulare dhe bashkëpunim intensiv me akademinë për transferimin e njohurive, hulumtimit dhe zhvillimit dhe inovacioneve.

Advertisement

“Do të jemi zëri kryesor i biznesit në Qeveri për të transmetuar kërkesat, nevojat dhe prioritetet e tyre në mënyrë që të krijojmë kompani më konkurrente, ekonomi më konkurrente, e si rrjedhojë edhe investime të reja që do të krijojnë vende të reja pune”, tha Durmishi.

Ai paralajmëroi se në përputhje me programin e Qeverisë, përmes Agjencisë së punësimit, e cila tani me riorganizimin e ri kalon në kompetencë të Ministrisë së Ekonomisë dhe Punës, do të sjellin programe që do të synojnë masat për punësimin e të rinjve, krijimin e shkathtësive dhe kualifikimeve, rikualifikimin dhe kualifikimin shtesë të kategorive të rrezikuara, trajnimet dhe shkathtësitë e nevojshme për tregun e punës, mbështetjen për sipërmarrësinë, si dhe bashkëfinancimin e trajnimeve për përdorimin e teknologjive të reja.

Kujtojmë që me ndryshimet në ligjin për riorganizimin e qeverisë, Ministria e Ekonomisë u shndërrua në Ministrinë e Ekonomisë dhe Punës.Portalb.mk

Të shtunën në Kumanovë, Alternativa ka thirrur Kongresin e jashtëzakonshëm zgjedhor në të cilin do të zgjidhet kryetari i partisë dhe organet e reja.

Thirrja e kongresit vjen pas dorëheqjes së Afrim Gashit nga pozita e kryetarit dhe zgjedhja e tij për kryetar të Kuvendit. Kandidati potencial për të kryesuar Alternativën e cila aktualisht është pjesë e koalicionit VLEN është Zeqirija Ibrahimi. Në fund të muajit maj, pas dorëheqjes së Gashit, për ushtrues detyre i kryetarit të Alternativës u caktua Bekim Sali.

Lideri i Lëvizjes BESA dhe njëherit kryetari i Tetovës, Bilall Kasami gjatë qëndrimit të tij në Tiranë të Republikës së Shqipërisë ka realizuar takim me Presidentin e Shqipërisë, Bajram Begaj.

Ky takim po aq vëllazërorë kishte edhe karakter punues duke e njoftuar presidentin Begaj për situatën aktuale politike, planet e qeverisë së re ku pjesë përbërëse është edhe Koalicioni shqiptar VLEN, zhvillimin dhe rrugën euroatlantike të të dyja vendet.

Presidenti Begaj uroi Kasamin për fitoren në zgjedhjet parlamentare duke vënë theksin tek përfaqësimi sa më i drejtë i shqiptarëve e qytetarëve duke çuar përpara projektet që zhvillojnë vendin. Kryetari Kasami e ngushëlloi presidentin Begaj me rastin e ikjes në amshin të shkrimtarit të njohur me përmasa botërore Ismail Kadare. Kadare iku por na la pas Kujtesë të pavdekshme për shqiptarizmën.