Shirat e dendur dhe erërat e forta kanë goditur Tajvanin, pasi stuhia më e madhe që ka goditur ishullin në gati tre dekada ka rënë në tokë përgjatë bregut të tij juglindor, duke vrarë të paktën një person dhe duke plagosur dhjetëra.

Tajfuni Kong-rey u përcoll nga erëra që afroheshin 200 km/h, ekuivalente me një uragan të kategorisë 3 në Atlantik, sipas Qendrës së Përbashkët të Paralajmërimit të Tajfunit (JTWC).

Bëhet e ditur se kjo është stuhia më e madhe që ka goditur Tajvanin që nga Typhoon Herb në vitin 1996. Nga tajfuni, raportohet një e vdekur dhe të paktën 73 të lënduar.

Përpara stuhisë së fuqishme, autoritetet lokale urdhëruan mbylljen e përkohshme të zyrave dhe shkollave, ndërsa Tajvani pezulloi tregtimin në tregun e tij të aksioneve, shkruan CNN

Ndryshe, Tajvani në përgjithësi ka një histori të fortë për t’iu përgjigjur tajfuneve të mëdha, megjithëse fshatrat e largëta në rajonet më malore mund të jenë veçanërisht të prekshme ndaj rrëshqitjeve të dheut.

Advertisement

Siç raportohet, Ushtria e Tajvanit ka vënë në gatishmëri më shumë se 34,000 ushtarë për të ndihmuar në përpjekjet e shpëtimit dhe mbi 8,600 njerëz janë evakuuar nga zonat me rrezik të lartë.

Më shumë se 500 fluturime, përfshirë 300 udhëtime ndërkombëtare, janë anuluar dhe të gjitha shërbimet e trageteve në ishujt periferikë të Tajvanit janë pezulluar, sipas Administratës së Aviacionit Civil.

Edhe shërbimet hekurudhore po funksionojnë me kapacitet të kufizuar, sipas operatorit hekurudhor.

Imazhet nga Agjencia Qendrore e Lajmeve zyrtare e Tajvanit dhe rrjetet sociale treguan valë “të egra” që përplaseshin në brigjet e qarkut Taitung, ndërsa pjesë të qarkut fqinj Hualien u zhytën në ujërat e përmbytjeve.

Kong-rey u intensifikua me shpejtësi për të arritur fuqinë e supertajfunit, ndërsa ai po lëvizte drejt Tajvanit pasi goditi Filipinet. Megjithëse stuhia u dobësua pak përpara se të arrijë në tokë, ajo po lëshon rrebeshe të forta, përmbytje të shpejta, valë stuhie dhe rrezik për rrëshqitje të dheut.

Advertisement

Është rritur bilanci dramatik i përmbytjeve të befasishme në juglindje te Spanjës, që numëron tani 105 viktima, e sipas autoriteve, me gjasë, ndoshta dhe nuk mbyllet me kaq.

Ministri i Transportit, Óscar Puente, deklaroi se ka “njerëz të vdekur nëpër makina”, duke iu referuar qindra automjeteve të vogla dhe kamionëve të bllokuar nëpër rrugë nga balta.

Në një garazh në Valencia sipas mediave lokale, ekipet e emergjencës gjetën 9 trupa të pajetë. Nuk është ende e qartë se sa janë të zhdukurit, por për të ndihmuar përpjekjet e shpëtimit, me qindra ushtarë janë dislokuar në këtë zonë, një nga më të goditura nga fatkeqësia natyrore.

Stuhitë të forta me reshje të dendura shiu dhe breshër sa “madhësia e topave të golfit” goditën Spanjën ku lumenjtë dolën nga shtrati, rrugët, shtëpitë dhe fushat u përmbytën në shumë vende, makinat dhe pemët u rrëzuan nga masat ujore.

Si shkak autostradat dhe rrugët e vendit duhet të mbylleshin në jug dhe lindje të Spanjës. Trafiku ajror dhe hekurudhor gjithashtu u prek. Mësimet u anuluan në shumë shkolla dhe universitete. Qeveria spanjolle në Madrid ngriti me urgjencë një shtab krize për t’u marrë me problemet e shkaktuara nga stuhia. Nga kryeqyteti u dërguan me shpejtësi njësi ushtarake të specializuara në operacionet e shpëtimit në Valencia për të mbështetur shërbimet lokale.

Advertisement

Nënpresidentja amerikane, Kamala Harris, e kritikoi ish-presidentin Donald Trump si njeri të paqëndrueshëm dhe të fiksuar pas hakmarrjes, gjatë një tubimi zgjedhor në vendin afër Shtëpisë së Bardhë ku, më 6 janar 2021, Trump iu drejtua mbështetësve të vet para se ata ta sulmonin Kapitolin.

Duke folur në Uashington më 29 tetor, një javë para ditës së zgjedhjeve presidenciale, Harris, kandidatja demokrate për zgjedhjet e 5 nëntorit, e dha atë që fushata e saj e quajti “mesazh përmbyllës” në një skenë të mbushur me shenja të mëdha ngjyrë qielli, me mbishkrimin “Liri”.

Harrisi u zotua se do të jetë “presidente për krejt amerikanët”, ndërsa e quajti kundërshtarin e vet republikan “të paqëndrueshëm, të fiksuar pas hakmarrjes dhe të pakontrollueshëm”.

Organizatorët thanë se rreth 75.000 njerëz morën pjesë në tubim, edhe pse ky numër nuk u verifikua nga policia apo vëzhguesit e pavarur.

Disa mbështetës të Harrisit kishin pritur në radhë për më shumë se shtatë orë për ta dëgjuar fjalimin e saj në parkun ku Trumpi kishte folur para se një grup nga turma ta sulmonte Kapitolin në përpjekje për ta penguar certifikimin e zgjedhjeve të vitit 2020.

Advertisement

Ish-presidenti dhe aleatët e tij janë përpjekur ta mohojnë dhunën e 6 janarit.

Para fjalimit të Harrisit, Trumpi dhe fushata e tij u përpoqën t’i kufizojnë dëmet, duke e mohuar një shaka denigruese për Porto Rikon që e kishte bërë një komedian në skenë para se Trumpi të paraqitej në një tubim në Nju Jork gjatë fundjavës. Disa prej aleatëve të Trumpit e dënuan atë shaka, e cila iu referua territorit amerikan si “një ishull plehrash”.

Derisa fushata e tij tha se ajo shaka nuk pasqyron pikëpamjet e ish-presidentit, Trumpi e mbrojti atë gjatë tubimit, ku kishte edhe deklarata të tjera raciste dhe vulgare.

“Dashuria në atë dhomë të lë pa frymë. Ishte sikur një festival dashurie. Kisha nderin që u ftova”, tha ai.

Trump nguli këmbë se Harrisi është ajo që ka përhapur urrejtje dhe përçarje, duke thënë se ajo ka kryer “një fushatë urrejtjeje”.

Advertisement

Mbrëmjen e 29 tetorit, Trumpi e mbajti një ngjarje në Allentovn, Pensilvani, një qytet i cili ka një komunitet të madh portorikan. Pensilvania është ndër shtatë shtetet e luhatshme që pritet të jenë vendimtare në këto zgjedhje.

Banorët e Porto Rikos nuk votojnë për president, por gati 6 milionë njerëz nga ishulli i Karaibeve, të cilët kanë emigruar dhe tani jetojnë në SHBA, votojnë.

Më shumë se 50 milionë njerëz kanë hedhur tashmë votat e tyre para kohe, ose me postë, vetëm një javë para ditës së zgjedhjeve dhe sondazhet tregojnë se gara do të jetë jashtëzakonisht e ngushtë.

Harris, 60-vjeçare, do të bëhej presidentja e parë grua, ndërsa Trump, 78 vjeç, do të bëhej kandidati më i moshuar që zgjidhet president. Të dy dallojnë në një sërë çështjesh, nga mbështetja për Ukrainën dhe aleancën ushtarake të NATO-s, deri te emigracioni, të drejtat e abortit dhe taksat mbi të pasurit.

Një sondazh nga Reuters/Ipsos më 29 tetor tregoi se epërsia e Harris kishte rënë në vetëm 44 për qind, krahasuar me 43 për qind për Trump ndër votuesit e regjistruar.

Advertisement

Trump ka lënë të kuptohet vazhdimisht se mund përsëri të mos e pranojë rezultatin e zgjedhjeve, nëse humb.

Këto komente, të kombinuara me dy përpjekje për atentat ndaj ish-presidentit, kanë ngritur shqetësime për dhunë të mundshme dhe kaos pas zgjedhjeve./ rel