Në fshatin Banjicë të Komunës së Çashkës ka filluar ndërtimi i Shkollës Fillore periferike “Dituria” ku mësimin do ta ndjekin nxënësit nga klasa e parë deri në të pestën. Sipas Ministrisë së Arsimit, tashmë është vendosur një platformë betoni ndërsa I gjithë procesi pritet të përfundojë brenda dy muajsh dhe gjatë kësaj periudhe kryetari i komunës së Çashkës duhet të sigurojë pajisje për objektin e ri shkollor. Xhafer Xhaferi banor i fshatit Banjicë tha për Alsat se punimet tashmë katër ditë po zhvillohen intenzivisht duke shtuar se të njëjtat janë paralajmëruar të përmyllen më 15 dhjetor. Sipas Xhaferit, objekti parasheh tre klasë ndërsa ndërtimi është prej çeliku.

“Po punohet gati katër ditë, çdo ditë vijnë edhe kanë thënë që deri më 15 dhjetor do të përfundoj. Për momentin seriozisht janë tu punu, vijnë gjashtë-tetë vetë. A do të përfundoj në kohën që kanë thënë, në kohën e caktuar apo jo nuk e di, premtime na kanë dhënë se do të përfundojë. Kanë thënë me çelik do të bëhet, me ato panellet”, deklaroi Xhafer Xhaferi , banor I f.sh Banjicë.

Ministrja e Arsimit dhe Shkencës Vesna Janevska ka deklaruar se investimi për objektin e ri shkollor kap shumën prej 6,6 milionë denarë. Në objektin e ri shkollor mësimi do të zhvillohet në gjuhën shqipe. Ndërkohë, në shkollën fillore “Todor Janev” në Çashkë, nxënësit shqiptarë nga klasa e tretë e deri atë të nëntë vazhdojnë të arsimohen në gjuhën maqedonase për shkak të mungesës së paraleleve shqipe.

Sektori i Punëve të Brendshme Kumanovë në bashkëpunim me Departamentin e Policisë Kriminale pranë MPB-së sot (01.11.2024) në ora 13:30 ka vepruar me urdhër të Prokurorisë Publike Kumanovë për zbardhjen e veprës penale “marrje e ryshfetit” me çka ka arrestuar L.T nga Kumanova, inspektore e autorizuar ndërtimore në Komunën e Kumanovës, e cila është konstatuar se ka pranuar ryshfet prej 4.000 euro.

“Me datë 25.09.2024, një qytetar ka raportuar në SPB Kumanovë se inspektorja e autorizuar ndërtimore L.T në komunën e Kumanovës, e cila po ushtronte kontroll në një objekt në ndërtim të cilin i dëmtuari po e ndërton dhe në të cilin i pandehuri gjatë kontrollit të procesverbalit ka konstatuar devijim nga leja e ndërtimit dhe për të mos i lëshuar vendim për ndërprerjen e ndërtimit dhe mos paraqitjen e raportit përkatës pranë organeve kompetente i ka kërkuar ryshfet, fillimisht në shumën prej 1.500 euro, që më 31.10.2024 t’i kërkojë 4.000 euro”.

“Pas pranimit të kallëzimit është njoftuar Prokuroria e Kumanovës dhe janë ndërmarrë masat përkatëse. Viktimës i janë dhënë para të përpunuara teknikisht, të cilat ia ka dhënë L.T, në një lokal në Kumanovë. Pasi ajo i ka marrë paratë, është privuar nga liria nga zyrtarët policorë”.

“Pas dokumentimit të plotë të rastit, L.T. do të paraqitet para prokurorit publik kompetent në Prokurorinë Publike Kumanovë”, thonë nga MPB.

Agjencia e Ushqimit dhe Veterinarisë njofton e nga data 29 deri më 31 tetor, shërbimet inspektuese të tyre kanë kryer kontrolle të jashtëzakonshme në 41 shtëpi të të moshuarve në vend.

Siç thonë prej atje, me kontrollet u konstatua se 14 prej tyre nuk ishin fare të regjistruar si operatorë ushqimor në AUV.

“Janë dhënë 16 vendime me urdhër për heqjen e mospërputhjeve të konstatuara, nga të cilat 4 operatorë kanë pasur kërkesa të pamjaftueshme higjienike, ndërsa 3 operatorë janë konstatuar se nuk kanë kryer kontroll të detyrueshëm shëndetësor”.

“Në 5 operatorë u sekuestruan 40 kilogramë ushqime të pasigurta dhe u asgjësuan pa dëm”, thuhet në njoftim.