Ministri i Politikës Sociale, Demografisë dhe Rinisë, Fatmir Limani, ka takuar sot përfaqësues të disa organizatave të shoqërisë civile – ofrues të shërbimeve sociale. Në takim u bisedua për angazhimet dhe synimet e përbashkëta në të cilat po punojnë të dyja palët, e që është sigurimi i mirëqenies së qytetarëve, përfituesve të shërbimeve.

Bashkëbiseduesit diskutuan për rezultatet e reformës sociale, me theks në deinstitucionalizimin dhe shërbimet sociale, të cilat përfaqësojnë një shembull të shkëlqyer në rajon se si sistemi i mbrojtjes sociale është në dobi të përdoruesve të shërbimeve.

Nga ana e Ministrisë u theksua se me fillimin e vitit 2025 parashihet rishikimi i Ligjit për mbrojtjen sociale, rregullimi i akteve nënligjore dhe monitorimi dhe vlerësimi i shërbimeve sociale.

Megjithatë, së shpejti do të publikohet një thirrje e re publike për shprehjen e interesit të komunave për ngritjen dhe zgjerimin e shërbimeve sociale dhe rritjen e numrit të përfituesve.

Bashkëbiseduesit ranë dakord për qëllimet e përbashkëta -përforcimin e sistemit të mbrojtjes sociale, dhe kjo bëhet më së miri duke forcuar shërbimet sociale përmes të cilave përdoruesit përgatiten për jetesë me mbështetje dhe përfshirjen e tyre në tregun e punës, si aktorë aktivë në shoqëri.

Advertisement

Aleanca për Shqiptarët-krahu i Selës ka kërkuar që ministri i shëndetësisë, Arben Taravari të largohet nga detyra së bashku me drejtorët e spitaleve që siç thotë, të shpëtojë shëndetësia dhe qytetarët, përcjell TV21. ASH-Sela thotë se, Taravari për më shumë se tre muaj është i njoftuar për situatën në spitalin “Kozle” dhe është zotuar se do ta hetojë rastin, por siç thotë ASH-Sela, ministri zgjodhi që në heshtje ta mbrojë drejtoreshën Karolina Simonovska dhe t’i injoroj të punësuarit dhe pacientët.

“Të largohet Taravari me drejtorët, të shpëtojnë shëndetësia dhe qytetarët

Që nga formimi i Qeverisë jolegjitime, sistemi shëndetësor ka hyrë në një kolaps të rëndë, ndërsa pasojat po i vuajnë qytetarët dhe veçanërisht fëmijët të cilët nga pakujdesia dhe papërgjegjësia përfundojnë në mënyrën më tragjike të mundshme.

Derisa ministri Arben Taravari shëtit nëpër emisione duke thënë fjalë boshe, në Klinikën e Fëmijëve vdesin çdo ditë fëmijë nga papërgjegjësia e tij dhe drejtorit të tij, ndërsa në Klinikën e Kozles, drejtoresha Karolina Simonovska, u bën terror të punësuarve dhe ai ka frikë ta shkarkojë. Nëse ka pak dinjitet dhe nuk është ushtar i verbër si deri më tani, ai duhet të jap dorëheqje së bashku me drejtorët e tij të paaftë.

Për këtë situatë Taravari është i njoftuar për më shumë se tre muaj dhe nuk ka guxim të ndërmerr asnjë veprim. Ai vetë e ka konfirmuar se që në muajin shtator ka pranuar ankesa edhe nga të punësuarit shqiptarë edhe nga ata maqedonas, për sjelljen fashiste dhe jo profesionale ndaj të punësuarve. Në një konferencë për media vetë pranoi se i ka takuar stafin mjeksor, u zotua se do të hetojë rastin, por që atëherë deri më sot kur të punësuarit përsëri shkruajnë letër publike, Taravari zgjodhi që në heshtje të mbrojë drejtoreshën dhe të injorojë të punësuarit dhe pacientët”, thotë ASH-Sela.

Advertisement

Sëmundja e murtajës tek përtypësit e vegjël është përhapur në shtetet fqinje, respektivisht në Greqi dhe Bullgari, ndërsa raste të këtilla janë hasur edhe në Rumani. Në vendin tonë, kjo sëmundje ende nuk është e pranishme, ndërsa autoritetet tashmë kanë filluar me takimet me blegtorët nëpër disa komuna për të parandaluar përhapjen e kësaj sëmundje. Përfaqësues të Agjencisë për Ushqim dhe Veterinari, kanë qëndruar në Tetovë, ku blegtorëve individual dhe Shoqatave të Blegtorëve u është sqaruar për shenjat klinike që shfaq sëmundja, siç janë ethet, infeksione në sy, humbje të peshës, kurse sëmundja paraqitet tek kafshët e reja, qengjat dhe dhitë, e më pak tek delet.

“Për njerëzit nuk ka rrezik, por nëse kjo sëmundje paraqitet edhe në vendin tonë, pasojat do të jenë të mëdha, pasi do të ndalohet eksporti për dy vite”, tha Svetllana Kolariq, sekretar Shtetëror për Ushqim. Nga agjencia njoftojnë se veterinerët janë trajnuar fillimisht se si ta njohin këtë sëmundje, sepse sëmundja është e përafërt me sëmundjen e shapit. Prandaj, veterinerët janë të parët që e detektojnë dhe më pas i alarmojnë institucionet përkatëse, nëse ka raste të dyshimta.

“Qengjat janë prodhimi ynë strategjik dhe si shtet duhet që të kujdesemi, të marrim të gjitha masat dhe të parandalojmë paraqitjen eventuale të sëmundjes. Paraqitja e sëmundjes do të thotë humbje të mëdha ekonomike, ndërsa për momentin – numri i dhive dhe derrave është rreth 480 mijë dhe do të thotë ndalim të eksportit, ndalesë për lëvizje, asgjësim i tyre, ndalesë për eksportin e qengjit. Për momentin nuk kemi asnjë shenjë të kësaj sëmundje në vendin tonë, ky është takimi ynë i shtatë me fermerët dhe janë marrë masa hyrjen e kësaj sëmundje dhe përhapjen e saj në vendin tonë”, informoi Kolariq.

Përfaqësuesit e Kooperativave Bujqësore thonë se këto takime janë të mira për t’u informuar me qëllim që të parandalojnë përhapjen e sëmundjes në vendin tonë. “Ne ende nuk e dimë se çfarë simptoma kanë kafshët prandaj janë edhe këto takime me blegtorët që t’i informojmë nga afër, në bashkëpunim me institucionet shtetërore që janë në kuadër të Ministrisë së Bujqësisë, që të parandalohet kjo sëmundje”, tha Naser Xhemaili, përfaqësues i Kooperativës Bujqësore “Sharri” në Tetovë. Gjatë takimit me blegtorët, janë dhënë edhe rekomandime se si të kujdesen për kafshët nga kjo sëmundje, duke përfshirë pastrimin, dezinfektimin, vaksinimin dhe kontrollim të tyre nga veterinerët.TV KOHA