Koalicioni VLEN në një kumtesë për media thekson se vazhdojnë punën për qytetarët e vendit, duke sjellë projekte madhore që ndikojnë drejtpërdrejt në përmirësimin e cilësisë së jetës. Nga VLEN thonë se ka nisur implementimi i një projekti të jashtëzakonshëm në Spitalin “8 Shtatori” në Shkup, një investim prej 12 milionë eurosh, që do të modernizojë dhe transformojë këtë institucion shëndetësor në standardet më të larta evropiane.

“Ky projekt përfshin rikonstruksionin e plotë dhe pajisjen më të avancuar të njësisë së terapisë intensive, duke shtrirë investimin në një sipërfaqe prej 2000m², ku do të ndërtohen shtatë salla operacioni supermoderne. Me këtë investim, Spitali “8 Shtatori” do të kthehet në një qendër shëndetësore të nivelit më të lartë, duke i dhënë fund mungesave infrastrukturore dhe teknologjike të së kaluarës”.

“Ky investim strategjik parashikon dy salla të specializuara për kirurgji abdominale, dy për ndërhyrje urologjike, një për operacione të veshit, hundës dhe fytit, një për kirurgji të syve dhe si risi absolute – kirurgjia robotike, e cila është e para e këtij lloji në vend! Ky është një hap gjigant drejt një shëndetësie moderne dhe të avancuar, ku teknologjia më e fundit vihet në shërbim të qytetarëve”.

“Si pjesë e këtij investimi madhor, do të bëhet renovimi i plotë i kulmit të spitalit dhe vendosja e një sistemi efikas të ngrohjes dhe ftohjes, duke garantuar kushte optimale për pacientët dhe stafin mjekësor. Për herë të parë, sallat e operacionit do të pajisen me gjeneratën më të fundit të tavolinave kirurgjikale, ndriçim LED të avancuar, kompjuterë mjekësorë, aparate anestezie të sofistikuara, pajisje kauterike, pompa infuzioni, defibrilatorë dhe gjithë inventarin e nevojshëm mjekësor. Kjo do të thotë që pacientët tanë do të kenë trajtime shëndetësore të një niveli superior, të njëjtë me ato të spitaleve më të mira evropiane”, thonë nga VLEN.

Më tej shtojnë se Ministri i Shëndetësisë, Arben Taravari, ka qenë shtytës kyç i këtij projekti transformues.

Advertisement

“Falë vizionit të tij dhe mbështetjes së koalicionit VLEN, qytetarët tanë do të kenë qasje në shërbime shëndetësore më cilësore, më efikase dhe më dinjitoze. Ky projekt vulos epokën e re të shëndetësisë moderne në vendin tonë! Investimet në shëndetësi janë investime në jetën dhe mirëqenien e qytetarëve, dhe VLEN po dëshmon se puna dhe përkushtimi i saj janë mbi çdo kalkulim politik! Shëndeti i qytetarëve është prioritet absolut dhe këtë e dëshmojmë me projekte konkrete e revolucionare. VLEN për qytetarët! VLEN për një jetë më të mirë! VLEN për shëndetësinë moderne dhe evropiane!”, thonë nga VLEN.

 Kryetari i Kuvendit, Afrim Gashi, prej sot deri më 27 shkurt 2025 do të kryesojë Delegacionin e Kuvendit për vizitë zyrtare në Mbretërinë e Bashkuar, e cila po zbatohet në bazë të ftesës zyrtare të Ser Lindzi Hojël, kryetar i Dhomës së Poshtme të Parlamentit të Mbretërisë së Bashkuar dhe në bashkëpunim me Fondacionin për Demokraci Vestminster.

Në përbërje të delegacionit janë: nënkryetari i Kuvendit, Jovan Mitreski; kryetari i Grupit Parlamentar për Bashkëpunim me Parlamentin e Mbretërisë së Bashkuar, Nikolla Micevski; zëvendëskoordinatorja e GP-së së Koalicionit të Frontit Evropian, Arbana Pasholli dhe sekretarja e përgjithshme e Kuvendit, Marina Dimovska.

Në përputhje me Programin, janë paraparë takime me Ser Lindzi Hojël, kryetar i Dhomës së Deputetëve të Parlamentit Britanik, me anëtarët e mundshëm të Grupit Parlamentar Gjithëpartiak për Bashkëpunim me Republikën e Maqedonisë së Veriut, me komisionarin parlamentar për standarde, Daniell Grindberg dhe me kryetarin e Komitetit të Mbrojtjes, Tan Desi dhe anëtarët.

Në kuadër të Programit, sekretarja e përgjithshme e Kuvendit, Marina Dimovska, do të ketë takim të veçantë me Tom Goldsmitin, sekretar i përgjithshëm / nëpunës i Dhomës së Poshtme të Parlamentit Britanik.

Kryetari i Kuvendit dhe Delegacioni, nga galeria e kryetarit të Dhomës së Poshtme të Parlamentit Britanik, do të ndjekin seancën e pyetjeve të deputetëve – Pyetje për Kryeministrin, e cila mbahet çdo të mërkurë.

Advertisement

Ndër aktivitetet tjera, në ambientet e Ambasadës së Republikës së Maqedonisë së Veriut në Londër, u organizua edhe takimi me përfaqësuesit e diasporës në Mbretërinë e Bashkuar për Kryetarin e Kuvendit dhe Delegacionin.

Kryetari Gashi dhe Delegacioni janë të ftuar të marrin pjesë në ligjëratën me të cilën Parlamenti Britanik e shënon përvjetorin e Këshillit të Evropës – “Këshilli i Evropës: 75 vjet e më tej”, që do të mbahet në Dhomën e Lordëve në organizimin e Kryetarit të Dhomës së Lordëve, Lord Mekfoll të Alkluit dhe në prani të kryetarit të Asamblesë Parlamentare të Këshillit të Evropës, Teodoros Rusopulos.

Më ftohtë në këtë mëngjes në Kodrën e Diellit – 2 gradë, ndërsa temperatura minus ka edhe në Manastir dhe Berovë, -1 gradë, njoftoi Drejtoria për punë Hidrometeorologjike.

Zero gradë janë matur në Kriva Pallankë, Tetovë, Krushevë, Lazaropole dhe Hanet e Mavrovës, 1 gradë në Demir Kapi dhe Vinicë, 2 në Shkup – Zajçev Rid, Prilep, Veles, Shtip, Kavadar dhe Strumicë, 3 gradë në Shkup Petrovcec, Pretor dhe Gjevgjeli dhe 4 gradë në Ohër.

DPHM njofton se në Strumicë deri në orën 7 të mëngjesit të sotëm në 24 orët e fundit janë matur 2 litra sediment ujor për metër katror. Në Kodrën e Diellit janë matur 30 centimetra shtresë dëbore, 3 cm në Hanet e Mavrovës dhe 2 cm në Berovë.

Paradite në disa lugina do të ketë mjegull. Gjatë gjithë ditës do të mbajë mot i ndryshueshëm me vranësira dhe me diell, kurse në zonat malore me kushte për reshje të dobëta dhe të shkurtra shiu. Do të fryjë erë e lehtë deri mesatare e ndryshueshme. Temperaturat maksimale do të lëvizin nga 6 deri në 12 gradë.

“Në Shkup paradite në disa pjesë të luginës do të ketë mjegull, ndërsa gjatë ditës do të mbajë mot me vranësira të ndryshueshme me periudha me diell. Do të fryjë erë e lehtë e ndryshueshme. Temperatura maksimale do të arrijë deri në 12 gradë, njofton DPHM.

Advertisement