Të nderuara media,
Para së gjithash, dëshiroj të shpreh ngushëllimet e mia të thella për të gjithë viktimat
dhe të lënduarit në ngjarjen tragjike në Koçan. Të lënduarve u uroj shërim të shpejtë.
Ministria e Ekonomisë dhe Punës, si institucion përgjegjës edhe për sektorin e
hetelierisë, që nga dita e parë e kësaj ngjarjeje tragjike ka qenë e gatshme për
bashkëpunim të plotë me organet kompetente. Si Ministri, kemi ofruar mbështetje të
plotë në të gjitha procedurat ligjore, duke siguruar që çdo shkelje e ligjit dhe çdo
keqpërdorim të sanksionohet siç duhet.
Sot dua të informoj për të gjitha kompetencat që ka Ministria e Ekonomisë dhe Punës
në lëshimin e licencave, si dhe për masat dhe zgjidhjet ligjore që do të ndërmerren dhe
që janë në kompetencën tonë.
Në pjesën e lëshimit të licencave, sipas Ligjit për Veprimtarinë Hotelierike, për të
funksionuar si klub nate, kabare, disko-klub apo disko-klub në hapësirë të hapur, është
e detyrueshme të posedohet licencë valide. Këtë licencë e lëshon Ministria e
Ekonomisë dhe Punës pas paraqitjes së kërkesës për lëshimin e licencës, në formularin
për pagesën e tarifës për shërbime.
Bashkë me kërkesën, duhet të dorëzohet edhe dokumentacioni në vijim:
1.Vendimi për regjistrim në Regjistrin Qendror të Republikës së Maqedonisë së Veriut
(origjinal, jo më i vjetër se 6 muaj);
2.Vendimi i këshillit komunal për përcaktimin e tarifës për kabare, klub nate, disko-klub
dhe disko-klub në hapësirë të hapur;
3.Aplikacioni për përmbushjen e kushteve minimale teknike për zhvillimin e veprimtarisë
hoteliere (kopje);
4.Pëlqimi nga organi i administratës shtetërore kompetent për punët nga sfera e punëve
të brendshme, që konfirmon përmbushjen e kushteve për mbrojtjen e rendit dhe
qetësisë publike, si dhe sigurinë e trafikut (origjinal).
Ministria e Ekonomisë dhe Punës, duke vepruar mbi kërkesën e dorëzuar, shqyrton
dokumentacionin që përmban akte dhe dokumente të lëshuara nga institucione të tjera
dhe, bazuar në to, nëse plotësohen kushtet, është e obliguar të lëshojë Licencën për
ushtrimin e veprimtarisë hoteliere për klub nate, kabare, disko-klub dhe disko-klub në
hapësirë të hapur, me afat vlefshmërie prej 1 (një) viti.
Ministria e Ekonomisë dhe Punës nuk është kompetente dhe nuk ka mekanizëm për të
kryer inspektim, mbikëqyrje apo kontroll në objektin ku do të ushtrohet veprimtaria. Sa i
përket shumës së tarifës që duhet të paguajë ushtruesi i veprimtarisë, atë e përcakton
këshilli komunal.
Tarifa paguhet 50% në llogarinë e komunës dhe 50% në Buxhetin e Republikës së
Maqedonisë së Veriut.
Si shtojcë e kërkesës, formulari i quajtur “Aplikacion për përmbushjen e kushteve
minimale teknike për ushtrimin e veprimtarisë hoteliere” është një dokument që subjekti
juridik e plotëson me të dhënat bazë të kërkuara, duke përfshirë informacionin për
subjektin, veprimtarinë, hapësirat sanitare për mysafirët, dispozitat e veçanta për të
punësuarit, kapacitetin e hapësirës së shërbimit, sistemin e ventilimit, numrin e daljeve
të emergjencës dhe kritere të tjera të rëndësishme.
Me këtë, subjekti deklaron se të dhënat e dhëna në aplikacion janë të vërteta dhe
formularin e dorëzon në njësinë rajonale të Inspektoratit Shtetëror të Tregut.
Sa i përket Pëlqimit nga organi kompetent i administratës shtetërore për punët e
brendshme, që konfirmon përmbushjen e kushteve për mbrojtjen e rendit dhe qetësisë
publike si dhe sigurinë e trafikut, aplikuesi mund të paraqesë kërkesë për këtë pëlqim
në Ministrinë e Punëve të Brendshme. Nëse nuk e dorëzon vetë, Ministria e Ekonomisë
dhe Punës, me detyrim zyrtar, do t’i drejtohet MPB-së me kërkesë për mendim.
Pas pranimit të mendimit nga MPB, Ministria e Ekonomisë dhe Punës përgatit Licencën
për të cilën është paraqitur kërkesa.