Pas ndeshjeve kthyese të play off-it që u zhvilluan mbrëmë Fejnordi, Club Brugge, Bayerni dhe Benfika kanë siguruar kualifikim në 1/8-ën e finales së Ligës së Kampionëve.
Milani në “San Siro” barazoi me Fejnordin 1-1 ndërsa vendimtare për kualifikimin e holandezëve ishte rezultati nga ndeshja e parë. Nga faza tjetër e garave është eliminuar edhe skuadra tjetër italiane Atalanta pas dy humbjeve nga belgët e Club Brugge 2-1 dhe 3-1
Një kualifikim dramatik ishte ai i Bayern-it, që u kualifikua vetëm falë një goli të minutës së fundit kundër Seltik në “Allianz Arena” dhe me rezultatin e përgjithshëm 3-2 vazhdon garat në fazën tjetër.
Spektakël u dhurua në Lisbonë, aty ku Benfica barazoi 3-3 me Monacon dhe arriti të kualifikohej vetëm falë fitores së arritur një javë më parë në principatë, me rezultatin e përgjithshëm 4-3.
Ndërkohë, që sot do të mësohen edhe katër skuadrat e fundit që do ta kompletojnë këtë fazë nga katër ballafaqime jashtëzakonisht interesante.
Dueli kryesor është ai ndërmjet Real Madridit dhe Mançester Citit që zhvillohet nga ora 21:00 në “Santiago Bernabeu”, sidomos pasi dihet që gjithçka është e hapur pas triumfit 3-2 të spanjollëve në ndeshjen e parë.
Tri ndeshjet tjera të ditës së sotme janë: Dortmund – Sporting, PSG – Brest dhe PSV -Juventus.
Shaban Sinani – TV Koha