Kryeministri i Kosovës, Albin Kurti ka bërë të ditur se gjatë ditës së enjte, njësi të specializuara të ushtrisë së Serbisë janë vërejtur vetëm disa metra larg kufirit me Kosovën, në afërsi të fshatit Banjë të Zubin Potokut.
Kurti ka publikuar një video dhe ka thënë se lëvizje të ngjashme janë regjistruar edhe në fshatin Oslare të Bujanovcit, në afërsi të kufirit me Kosovën.
“Jemi të vetëdijshëm se Forcat e Armatosura të Serbisë janë duke realizuar stërvitjet e rregullta dhe ato janë duke i përdorur si pretekst për të shkaktuar provokime të qëllimshme në afërsi të kufirit me Kosovën”, tha Kurti.
Ndërkaq, theksoi se janë duke u vëzhguar me kujdes se a do të përpiqen ta kalojnë kufirin, gjersa shtoi se edhe ky afrim i automjeteve të tyre ushtarake nuk është normal.
Agjencia e Inteligjencës së Shteteve të Bashkuara ka bërë publik raportin e saj vjetor, ku vë në dukje kërcënimet që priten të ndikojnë në stabilitetin global, me një vëmendje të veçantë ndaj Ballkanit Perëndimor.
Raporti parashikon se gjatë vitit 2024, rajoni mund të jetë epiqendër e dhunës ndëretnike.
Siç thekson dokumenti, udhëheqësit nacionalistë në rajon mund të përkeqësojnë tensionet për të përfituar avantazhe politike, dhe për të manipuluar ndikimin e aktorëve të jashtëm.
Sipas të dhënave të publikuara, përmes kësaj do të synohet përforcimi dhe shfrytëzimi i dallimeve etnike për arsye të ndryshme, përfshirë rritjen e ndikimit rajonal ose pengimin e integrimit të mëtejmë të Ballkanit në Bashkimin Evropian dhe strukturat euroatlantike.
Raporti i referohet ngjarjeve të fundit në rajon, si agresioni i Banjskës ku mbeti i vrarë polici Afrim Bunjaku, dhe tensionet e muajit maj 2023, ku përleshjet mes KFOR-it dhe protestuesve serbë në veri të Kosovës lanë të plagosur dhjetëra ushtarë të forcave paqeruajtëse.
Ditë më parë, presidenti i Serbisë, Aleksandar Vuçiq, kërcënoi publikisht Kosovën, duke thënë se “Serbia do të presë momentin më të mirë të mundshëm dhe do ta shfrytëzoj mundësinë për të vepruar”.
Kjo deklaratë e Vuçiqit, ka nxitur reagime përbrenda dhe jashtë Kosovës.
Deputeti gjerman i Parlamentit Evropian, Reinhard Butikofer, në një reagim në platformën “X”, ka pyetur liderët e BE-së nëse e kanë dëgjuar deklaratën e Vuçiqit për Kosovën.
Tutje tha se si mund të vazhdohet me pretendimin se “problemi” është kryeministri Kurti, kur por e lejoni Vuçiqin të mbjellë farën e luftës.
“Hej, Joseph Borrel, Miroslav Lajçak dhe Oliver Varhelyi. A e dëgjuat këtë me zë të lartë dhe qartë? Si mund të vazhdoni të pretendoni se “problemi” është kryeministri Kurti? Ju pretendoni se ndiqni “stabilitetin”, por e lejoni Vuçiqin të mbjellë farën e luftës! Vonderleyen ju duhet të ndryshoni kursin e BE-së! Tani!”, ka shkruar ai.