Në disa rrugë të Greqisë ende nuk janë ndryshuar tabelat e vjetra të trafikut në të cilat shkruan Shkup ose FYROM, megjithëse Marrëveshja e Prespës parashikon respektimin e emrit të ri, Republika e Maqedonisë së Veriut.
“Në fushën e marrëveshjes së Prespës, një pjesë e madhe e punës është zbatuar, janë disa ratifikime që duhen bërë në parlamentin grek, ka edhe disa detyrime në vendin tonë që duhen zbatuar në sferën e politikave tatimore etj. Një pjesë e punës është në kompetencën e autoriteteve rajonale që përmendëm dhe Greqia me siguri do të punojë për zbatimin e saj në periudhën e ardhshme, ashtu siç po punojmë ne për zbatimin e elementeve të tjera të marrëveshjes me Greqinë”, tha kryeministri I RMV-së Dimitar Kovaçevski.
“Shembull i përkushtimit të institucioneve në Greqi është regjistrimi i qendrës për gjuhën maqedonase, i cili u kontestua, por gjykata në Greqi solli vendim shumë të qartë se është diçka që mund të regjistrohet në Greqi dhe ata që dëshirojnë ta ruajnë gjuhën maqedonase mund ta bëjë këtë lirisht në mënyrë institucionale”, shtoi Kovaçevski.
Marrëveshja e Prespës, e cila zgjidhi mosmarrëveshjen e gjatë maqedonase-greke për emrin, u nënshkrua më 17 qershor 2018, në anën greke të liqenit të Prespës, në fshatin Nivici (Psarades).
